[CMI Galiza] Proposta de editorial: Arafat

[imc-galiza lists.indymedia.org]

xentes, aquí vai outro editorial

Título: Arafat
Foto: http://www.granma.cu/fotos1/noviembre04/arafat11.jpg
Texto:

Durante séculos a franxa comprendida entre o río Xordán e a costa 
occidental do mediterráneo foi espazo de convivencia de culturas e cuna 
das tres grandes relixións monoteístas do planeta: Terra Santa para o 
cristianismo, Terra de Sión para o xudaísmo e Lugar Sagrado 
para os musulmáns.

No contexto dos movementos nacionalistas de finais do século XIX 
consolídase o sionismo como movemento que promove a progresiva 
colonización de Palestina por xudeus europeos. Os conflictos que xenera 
esta política colonial co proxecto de independencia palestino provocan a 
intervención dos estados árabes veciños cando en 1948 a comunidade xudea 
declara unilateralmente a creación do estado de Israel.

Co apoio dos estados occidentais comeza a história dunha ocupación 
militar criminal que non dubida en bombardear escolas, organizar 
incursións que provocan a morte de familias enteiras destruindo as súas 
casas e disparando mísiles dende helicópteros contra a poboación,  
impedir a vertebración da sociedade palestina mediante muros de separación e 
centos de checkpoints ou destruindo os pozos de auga e as 
infraestructuras que constrúen as organizacións humanitarias.

A pesar das unánimes condenas e das múltiples resolucións da ONU o estado 
israelí continúa intensificando a súa política xenocida que é 
amplificada e xustificada polos meios de comunicación como "loita 
contra o terrorismo". É así como se pode comprender que a morte de 
Yasser Arafat, Presidente da Autoridade Nacional Palestina e Premio 
Nobel da Paz sexa transformada na morte dun terrorista que debe ser 
enterrado entre escombros sin que se expliquen as causas da súa morte. 
Unha desmemória programada para que esquezamos que a loita do pobo 
palestino é polo seu direito a vivir dignamente nun território ocupado 
militarmente.